أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا.كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.
صباح/مساء الخير لكم جميعاً يا أجمل أعضاء. في البداية أشكر كل من أرسل وسأل بخصوص أعمالي الجديدة .. وحاب أوضح حاجة مهمة لكم .. أنا حالياً أشتغل على كتابة روايتي الرسمية، وصراحة العمل عليها أخذ كل وقتي لأني حاب تكون الرواية احترافية بمعنى الكلمة .. لذلك أحتاج وقت طويل يصل لسنة أو أكثر، للانتهاء منها .. وفي نفس الوقت ما أبي أنقطع عنكم .. ولأجل أوفق ما بين هـ الشيئين .. قررت أكتب عمل قصصي, شعبي، بسيط، ومكتوب " بالعامية " وفضلت يكون بالعامي لسببين .. الأول لأن بعض المتابعين تعجبهم النصوص القريبة من واقعهم، والثاني لأن الكتابة بالعامية سهل جداً وممكن أكتب البارت في ساعة واحدة .. بعكس الكتابة بالفصيح ممكن البارت يستغرق مني أسبوع كامل. عموماً العمل الجديد عبارة عن سلسلة متصلة منفصلة .. بحيث في كل حلقة راح يتم فيها مناقشة موضوع واحد تدور أحداثه داخل بيت عائلة .. وإذا أعجبكم هالعمل راح أستمر كل فترة في طرح حلقة جديدة منه.
عنوان المسلسل: عائلة أي كلام. نوع المسلسل: دراما اجتماعية/كوميديا.
الحلقة الأولى " الوجبات السريعة "
يسكن أبو محمد وعائلته، في حارة " الطخمان " وسط بيت شعبي بسيط.
(الساعة 6 الصبح في بيت أبو محمد)
-بدر يا وليدي قم جعلي ما أحتر عليك .. باص المدرسة بيجي وأنت للحين ما قمت. -(بدر مخبي وجهه بالبطانية) يوووه يمه .. تعبت كل يوم أروح للمدرسة. -يا وليدي لازم تدرس علشان تدخل الجامعة وتتخرج وبعدها تتوظف. -هذا أخوي " محمد " متخرج من الجامعة وآخرتها ما توظف .. وشوله أتعب عمري من الحين!! -آه منك بس .. هذا وتوك أبو 11 سنة يطلع منك ها لحكي ! أجل لا كبرت وش بتقول ؟ .. لكن دواك عندي .. ما ينفع معك إلا أبوك يجي يقومك. -(طمر بدر من سريره بحركة بهلوانية) لا خلاص يمه قمت .. قمت.
(في نفس الوقت لكن في الصالة دار هالحوار)
-ص ص ص صباح الخير يبه. -صباح النور .. هلا سعد .. أختك جاها باص الجامعة ولا لا؟ -إيه جاها م م م من شوي. -إيه زين .. أجل يالله مشينا أوديك للمدرسة.
(وصّل أبو محمد ولده " سعد " للمدرسة المتوسطة، وبحكم أنه متقاعد عن العمل .. رجع مرة ثانية للبيت وجلس يتقهوى مع زوجته)
-سم فنجالك يابو محمد. -(أبو محمد يشرب قهوة) بدر راح للمدرسة؟ -إيه .. جاه الباص من شوي. -الله يعين على هـ الأولاد .. شيبنا وحنا نودي ونجيب فيهم. -الله يعطيك الصحة والعافية. -الشكوى لله .. ولا عندي رجالن يمشي على زنده الثور وبدال ما يعاوني على أمور البيت .. مقضي عمره في سهر بالليل ونوم في الصبح. -وليدي محمد مسيكين من تخرج من الجامعة وهو يلف على الوزارات والشركات ويقدم عليهم .. بس ماحدن قبل فيه. -يا أم محمد الشغل مهوب لازم يكون على مكتب في وزارة ولا شركة .. الي يبي الرزق يقوم من صباح الله يكد ويشتغل أي شغله .. إن شاء الله يبيع فواكه وخضار. -عاد تبي وليدي يبيع خضرة وهو متخرج من الجامعة!! -لا أبيه يتبطح تحت المكيف وينام طول النهار .. وكل يومين يجيني يقول يبه أبي فلوس!! -ما عليه يابو محمد .. إن شاء الله ينصلح حاله ويرزقه ربي بوظيفة زينه. -أقول فكينا من ولدك محيميد .. أبوي قام ولا لا؟ -إيه قام بدري وقهويته وفطرته. -الله يعطيك العافية .. أجل بروح له في غرفته اسلم عليه .. بس بشري عسى اليوم باله معه؟ -والله ماش .. مرتن يناديني باسمي ومرتن يناديني باسم أمك الله يرحمها. -عاد كبر السن وش نسوي .. يالله أبقوم له.
***
(دخل أبو محمد على أبوه في غرفته)
-السلام عليكم .. صبحك الله بالخير يبه. -هااااااه. -(أبو محمد يرفع صوته) أقول صبحك الله بالخير يبه. -الله يصبحك بالنور .. وين أمك .. أتحراها من ساعة تجيب لي الفطور. -الله المستعان .. أمي ميته من زمان. -رمااااان .. مابي رمان أبي مراصيع. -يبه وش جاب طاري الرمان.. أقووول أمي ميته من زماااان. -(فجأة بدأ الشايب يقول قصيدة) يا بنت يام العيون السـود خوفـي مـن الله وحبينـي وإن ما حصل حبتٍ بركـود بموت وأنتـي تشوفينـي. -(أبو محمد يضحك) يبه .. للحين فيك حيل تحب. -لا تكلمني يا عبدالله .. أنا زعلان منك. -أفا .. ليه وش أنا مسوي؟ -الحين ما تقولي ليه ما سميت واحد من عيالك على اسمي!! -الله المستعان .. الله يحفظك من في هـ الزمن يسمي " سمري " .. الناس تغيرت واساميهم تغيرت بعد.
***
(الساعة 2 الظهر جهزت أم محمد الغداء واجتمع الكل على السفرة عدا سعد وبدر)
-الحين وين سعد وبدر؟ -(ردت نوف) والله يبه يقولون ما يبون شيء. -(أم محمد متربعه) الله يهديهم بس .. ولا فيه أحد يعاف مثلوثة أم محمد. -(محمد متحمس) أنتي يا يمه لو تطبخين " حصى " متأكد إن طعمه بيكون حلوو. -(نوف بضحكة) لايق عليك تأكل حصى. -(محمد باستهزاء) هه هه هه .. وش هالذبة القديمة الي جايبتها من أيام لما كانت المستشفيات تغسل الكلى باليد.
(فجأة والكل يأكل رن جرس الباب وراحوا له سعد وبدر طايرين.. وبعد شوي رجعوا ومعهم كيسة أكل من المطعم)
-(أبو محمد معصب) ما شاء الله عليك يا سعيدان أنت وبدير .. الحين تعافون أكل أمكم وتقولون مانبي .. وآثاريكم طالبين من المطعم. -(سعد متردد) ي ي يبه أنا وبدر م م م ما نحب المثلوثة. -تعاف المثلوثة وتطلب هالبرقر المخيس. -(بدر بعفوية) يبه أنتوا تأكلون المثلوثة القديمة (رز،وقرصان،وجريش) وأنا وسعد نأكل المثلوثة الجديدة (لحم،وخبز،وجبن)
(محمد ونوف فاطسين ضحك)
-(أبو محمد كاتم الضحكة) أقول الله يخلف علي .. ما غير تبلعون في هالبرقر وما تدرون وش ملته .. هو لحم كلاب ولا لحم قطاوه .. تملون بطونكم وآخرتها كل واحد فيكم منتفخ وطالعن له ديود وكرشة تقول حرمة في السابع. -(نوف بحماس) أنا أتوقع إنه لحم كلاب. -(محمد يقاطعها) لا لا شكله لحم قطاوه .. لأن المطعم الي طلبوا منه له سنه فاتح في حارتنا ومن ذاك الوقت والقطاوه كل مالها تنقص في الحارة. -(رد سعد) ال ح ح حارة .. ولا الباردة. -(محمد يضحك) يا عمري على سعودي لا صار ينكت وهو ينتع .. مدري هو أنا أضحك على الذبة ولا على النتعة هههههههه. -(أم محمد متحمسة) أقول أتركوا عنكم كثرة البربرة .. يا ولدي يا سعد وش تبي بأكل المطاعم خصوصا البرقر .. تراهم وصخين وكل يوم نسمع عن حالات تسمم .. وأخرتها قبل أسبوع " ماجد " ولد خالتك .. أكل شورما وطاح من الوجع وبعدها دخلوه المستشفى وسوله غسيل معدة. -(نوف بتريقه) عاد أنت يا سعد بطنك كبير يعني " سوبر سايز " .. بيسوون لك غسيل بـ 500 والكوي مجاناً. -(محمد يأكل) حلوووه يانوف مع إني ما أواطنك. -(سعد منقهر) ط ط ط طيب هين أوريكم.
***
(الساعة 7 الليل دخل سعد على أمه في المطبخ ومعه كيسة لحم)
-هلا يمه هذا لحم مفروم أبوي جايبه يقول سوي لنا فيه مكرونة بشاميل. -إيه زين .. الله يجزاه خير.
(جهزت أم محمد العشاء واجتمع الكل على السفرة وكالعادة بدون سعد وبدر)
-(أبو محمد بصوت مرتفع) وين سعد وبدر ولا بعد طالبين برقر من المطعم. -(ردت أم محمد) ما يبون مكرونة .. وسويت لهم أندومي قبل شوي. -(أبو محمد يأكل مكرونة) ا ممممم والله وش زينها هالمكرونة .. تسلم يدينك يالغالية. -(نوف تذوقها) إيه والله يمه صراحة طعمها ممتاز. -(محمد يأكل) والله إنكم صادقين صراحة هـ المكرونة ما تتفوت. -(أبو محمد متحمس) حتى أبوي جازت له .. شوفوه يأكل. -(رد الجد) وش زين هاللحم يا عبد الله .. واضح إنه نعيمي. -(أم محمد مستحية) الله مير يسلمكم كلكم .. لكن هالمكرونة طالعتن زينه ما هو مني .. إلا من اللحيمات الزينة الي جبتها اليوم يا أبو محمد. -(أبو محمد مستغرب) وش تقولين !! اليوم ماجبت لحم !! -(ردت أم محمد) اللحم المفروم الي جبته وعطيته لسعد وقلت له خل أمك تسوي فيه مكرونة. -(أبو محمد معصب) وش تقولين أنتي !! أقولك ما جبت اليوم لحم ولا أرسلت لك لا سعد ولا غيره !! -(نوف بصوت عالي) أجل سواها فينا سعد !! -(رد محمد) صراحة سواها سعيدان وأكلنا البرقر .. بس تبون الصراحة طعمه حلو.
(سعد وبدر في غرفتهم ومقفلين عليهم الباب بالمفتاح)
-(سعد مبسوط) ش ش ش شفت كيف يا بدر أكلت أهلي المقلب .. رحت للمطعم وشريت منه ب ب ب برقر ني .. وعجنته بيدي لين صار كنه لحم مفروم وعطيته أمي وقلت لها هذا ل ل ل لحم مفروم جايبه أبوي. -(بدر يضحك) هههههههه .. طيب من وين جبت الفلوس؟ -(رد سعد) والله سيرت على غرفة محمد وهو بالحمام ولقيت في محفظته (35) ريال وأخذتها ، وخفت إنها ما تكفي .. ورحت لغرفة نوف ودخلتها يوم نزلت تحت للمطبخ وأخذت منها بعد (25) ريال. -(بدر متحمس) يعني كذا أكلناهم برقر بالغصب ولا وعلى حسابهم ههههههههه.
(المهم يقولون الحين محمد مرسله أبوه يجيب نجار علشان يكسر لهم قفل غرفة سعد وبدر)
هام جداً: قوانين المساهمة في المواضيع. انقر هنا للمعاينة
احترم مواضيع الآخرين ليحترم الآخرون مواضيعك لا تحتكر الموضوع لنفسك بإرسال عدة مساهمات متتالية عند طرح موضوع يجب أن تتأكد أن عنوان الموضوع مناسب او لا تحل بحسن الخلق و بأدب الحوار و النقاش لا تنس أن اختلاف الرأي لا يفسد للود قضية, فلا تتهجم على عضو بدعوى أنه لا يشاطرك الرأي ان قطعت عهدآ مع عضو فأوفي بوعدك لأنه دين عليك إن حصل خلاف بينك و بين عضو حول مسألة ما فلا تناقشا المشكله على العام بل على الخاص ان احترمت هذه الشروط البسيطة, ضمنت حقوقك و عرفت واجباتك. و هذه افضل طريقة تضمن بها لنفسك ثم لمساهماتك و مواضيعك البقاء و لمنتداك الإزدهار في موقعنا إدارة زي افلام
zee aflam :: 
عائلة اي كلام قصه قصيره
الرئيسية
الإثنين 25 نوفمبر 2019, 4:07 am
الخميس 18 ديسمبر 2014, 11:15 pm
![•-[ :: بوليوودي متقدم :: ]-•](https://i.servimg.com/u/f48/15/78/99/92/511.gif "•-[ :: بوليوودي متقدم :: ]-•")
آلآوسمه؛؛ ~
▌ ..}~
▌ ..}~
▌ ..}~
mms
▌ ..}~
موضوع: عائلة اي كلام قصه قصيره 
هام جداً: قوانين المساهمة في المواضيع. انقر هنا للمعاينة 
